O emblemático Huelgas Ensemble, dirixido por Paul Van Nevel, estrea en España esta produción pertencente ao ciclo de Retratos musicais de pintores do Renacemento, no que se exploran as relacións existentes entre música e arte neste tempo.
Resulta tan suxestivo preguntarse que escoitaban os pintores do Renacemento e que pintores lles gustaban aos seus músicos, como diversas poden ser as respostas. O programa pretende establecer unha, na medida do posible, congruente relación biográfica entre diferentes artistas, polo que a música que se escoitará procede do contorno inmediato dos pintores retratados neste ciclo. En concreto, a vida de Lucas Cranach amosa de maneira especial o mundo do Renacemento alemán. Augsburg e Wittenberg (o sur católico fronte á Alemaña central reformada), representan dous mundos opostos no relixioso e no cultural. Lucas Cranach habitou as dúas cidades, o que lle permitiría asumir ambas as culturas e plasmalas na súa obra. Desta maneira o programa explora no mundo de Cranach para reflectir asemade as dúas veciñas, ao tempo que diferentes, culturas. Cancións alemás, extractos de misas, motetes de Ludwig Senfl, Thomas Stoltzer, Ludwig Daser e Johann Walther e obras dos grandes cancioneiros dos humanistas, coleccionistas de música, Arndt von Aich, Nicolaus Apel e o magister Leopold, compoñen este magnífico programa.
…xoves 21 de outubro /// Igrexa da Universidade, Santiago de Compostela >> 20.30 horas
